نجمة السعودية مجلة فنية وطنية متنوعة
أنا اللي ربي أكرمني ب أبو باصرار رباني
على القران والسنة وعزة النفس وديني
على اني افتدي ارض ثراها ضم جداني
هل العوجا هل التوحيد مات وهو يوصيني
رحمك الله يا مساعد بك المولى رفع شاني
وبمعزي اخو نورة وهذا الامر يكفيني
بسادة مجد هذا العصر تاج العز عماني
بآل سعود هم ذخري وهم فخري اللي يرضيني
غدا بوردي وتسبيحي وذكري رطب لساني
تفصحت بكتاب الله وتسامى فيه تكويني
وانا انسان بي تقصير وسو تقدير اغواني
مقابل نفس لوامة تحاول دوم تثنيني
اخاف الله ولا اشرك به ولي رغبات تقواني
وكم اخطيت واستغفر عسى تثقل موازيني
وانا شاعر ندر فكري سبق عصري ووداني
لمعاني نادرة كانت بكر لين التقت فيني
انا الانجاز والايجاز والاعجاز أقراني
ولا منجز ولا موجز ولا معجز يوازيني
اهدم سائد وابني انا الهادم انا الباني
غروري منتهى الانصاف في سردي وتدويني
تأملت فخفا نفسي تقلبها كم اشقاني
اشك بما تيقنته ولا اوقن بتخميني
ودنيا حالها مربك اذا ضحكني بكاني
تصافي لين أأمنها وهنا حتما تجافيني
وصديق ضرني بالعمد اكرمته وآذاني
وحبيب في ظماي ارويه كاس الغدر يسقيني
انا وش حاجتي لأعدا اذا هاذول خلاني
واذا درعي هو القاتل واذا جرحي بسكيني
انا لو صار مهما ما تتزعزع اركاني
وخيباتي تقويني وما يقتلني يحييني
وما خلقت ثقيلات الحمول الا لأمتاني
وماكانت صروف الدهر الا لجل تمكيني
انا ربي خلقني طود شامخ للي ينخاني
علي يركي ويبشر بي على الهقوة يلاقيني
انا الواقف انا الوارف انا العارف بإمكاني
اخبي همي العاتي وافزع للي ناصيني
انا الفازع انا الفارع انا البارع بإتقاني
مداوي جروح من عانى ولو هو جرحي يدميني
سألني عاذلي الشامت سؤال الكاذب الحاني
وش اللي ترجي جاوبته ابي تخلد عناويني
ابي شاطي بحر والموج فيه يبدد احزاني
وابي احزان تتبدد وما تستوطن سنيني
وابي ما اتقي شر الذي غطاه احساني
وابي اصحاب ماتغدر واعدا ما تصافيني
وابي بلادي بعز وخير ابي حسادها يعاني
وابيه يدوم في حسرة كثير الامر يعنيني
وابي صحة على قدر الألم لامن تبلاني
وابي اغني غنا يطغي وانا اغصبه يهديني
وابي ما ارد اي سائل كذوب او صادق جاني
وابي اعطي وابي ربي ألوف اضعاف يعطيني
وابي من هو خذا مني يقول فداخله ماني
مصدق قلت ابي حاجة انا ماقلت يغنيني
وابي بالطيب اكون اول وبعدي اصبح الثاني
وابي اعفو مع القدرة عن اللي كان يوذيني
وابي اضحك مثل طفل قديم فسالف ازماني
ولا قد قال ابد يارب شر الضحك تكفيني
وابي ابكي بكا كهل تيقن بانه الفاني
وابي يارب ترحم ضعفي وسترك يغطيني
وابي يارب تغفر لي انا المذنب انا الجاني
وابي رحمتك ياربي بعدلك لاتجازيني
