نجمة السعودية مجلة فنية وطنية متنوعة
جيت وادري هذا هو آخر لقا
جيت أبدا من نهايتنا الشقا
جيت احفظ كل ملمح فاتني
فيك لجل اقوى أعيش اللي بقا
جيت مخفي دمع سال بداخلي
قد سمعت بعاشق دمعه رقى ؟
لا تبرر لا توضح ما خفا
ما خفا باين على وضح النقا
كنت تعشق صفو وقتي وقوتي
وجار وقتي وصار عشقك ينتقى
ما ألومك هكذا طبع البشر
يرتوي الظامي وينسى اللي سقا
اتقي من غدر طعنات العدا
كيف طعن اللي فديته يتقى ؟
من هقا ان الوفا يجزي بوفا
يكرمه وقته بعكس اللي هقا
يمشي العشاق درب بلا رجوع
وما يصيروا في المفارق اصدقا
جيتك وقلبي يبي يلقى حبيب
ويا عذاب القلب مما بك لقى
